Buyuang Amo: Pinang

 

Katiko Datuak Sati jo si Buyuang Amo bajalan pulang, nampak pulo lah batang pinang balirik di topian Batang Agam. “Iko lai tahu, ang?” kecek Datuak Sati ka si Buyuang.

     “Kalau iko tantu tau lah, mak. Iko namonyo ta-naman ‘pinang’ dan bahaso latinnyo ‘areca catechu’ dan urang Inggirih menyobuknyo ‘betel palm’. Iko tanaman monokotil mah mak kecek guru biologi den dulu di SD,” kecek si Buyuang nan lah mulai di ateh angin.

     “Satahu den buah pinang iko punyo potensi ekono-mi nan rancak mah, mak. Buah pinang ko palangkok siriah jo gambia dalam carano. Batangnyo bisa untuk lomba panjek di 17 agustusan atau tahun baru, khatam quran, dll. Ruyuangnyo nan koreh rancak dijadian untuak sasak rumah godang. Samo rancaknyo jo kayu nibuang nan masih samo varian jo palm bagai. Kini dengan kamajuan industri dan farmasi, buah pinang iko lah banyak gunonyo, mak. Bisa ma ubek sakik disentri, diare badarah, kudisan, cacingan. Salain itu bisa untuak bahan pewarna merah alami dan untuak manyamak. Bisa juo untuak mampaketek rahim sate-lah malahiakan dengan caro ma robuh buah pinang masak iko lalu aie nyo diminum salamo saminggu. Dan kini buah pinang iko lah bisa diekspor bagai ka India dan Cino. Samantaro daun palopahnyo bisa di-gunoan untuk barang kerajinan. Bisa untuk keranjang, tas, dompet, dll. Iyo rancak bona iko untuak bahan cendramata, mak. Sodangkan arai nyo bisa pulo untuk dijadian cetakan kue. Itu nan kue arai tuh namonyo, mak,” kecek si Buyuang nan kabatulan baru sajo salo-sai panalitian tantang pinang iko disuruah buek tugas dek dosen.

     “Tumben lai codiak, ang kini. Salamo ko kama ajo ang,” sindia Datuak Sati mambuek si Buyuang Amo tarangah.

     “Ado den tahu sabinjek lai, mak, yaitu bateh barih balobeh Luhak Limo Puluah badasarkan musyawarah di Balai Tinggi Sitonang Muaro Lakin: dari Sialang Ba-lantak Basi sampai ka si Sauk Sungai Rimbang, hilianyo si Pisak Pisau Hanyuik. Dari Durian Ditakuak Rajo sampai ka Silukah Pinang Tungga. Dari Pinang Mancuang Hilia sam-pai ka Gunuang Sailan Mudiak,” kecek si Buyuang Amo. “Kok iyo lai pangulu mamak, di ma Silukah Pinang Tungga tuh?” tanyo si Buyuang ma uji-uji Datuak Sati Nan Bona di Langkik.

     “Kalau itu ka ang tanyo, ba a pulo ndak ka tahu den. Buruak-buruak sarupo iko aden dulu kan pernah manjadi ‘tentara dalam’. Di Silukah Pinang Tungga tuh lah aden poi ma ijok dulu malawan ‘tantara pusat’. Asa ang tahu, itu di Silukah barado di tapian Batang Kuantan. Ado kereta api zaman Jopang masih tatingga di situ. Ndak jauah dari situ ado Tapuih, tompek aia Batang Kuantan agak landai. Di sikolah palabuhan go-dang zaman Pagaruyuang dulu menuju Pantai Tmur. Sampai-sampai daerah iko mandapek julukan “Malako Kociak”. Untuak labiah jaleh dek ang, Silukah jo Jo-rong Pinang itu bagian dari Nagori Durian Godang di Kabupaten Sijunjuang. Rute PDRI juo dulu itu, mah. Lai tahu ang jo PDRI?” kecek Datuak Sati ma uji si Buyuang.

     “Ndak tahu. Apo PDRI itu, mak?”

     “Yo ndak ado nan baliang dek ang de yo!” sugah Datuak Sati mancoliak si Buyuang Amo.

 

Feni Efendi, seorang penulis, peneliti, dan pengamat literasi yang berasal dari Payakumbuh