Buyuang Amo: Aua Kuniang

 

Raso lah lamo togak di tobiang Batang Agam, male-ngong lah ka suok ka kida Datuak Sati. Kok matahari lah mulai condong. Kok potang olun kolam bona. Salagi malengong suok jo kida nampak aua kuniang tumbuah di tobiang Batang Agam dek Datuak Sati. “Oi, Yuang. Molah awak cigok ka rumpun aua ku-niang ten,” kecek Datuak Sati manyuruah Buyuang sagiro naiak ka tobiang.

     “Apo nan nampak dek, mamak? Lai ka manolong tugas kuliah den kalau mancoliak itu, mak,” kecek si Buyuang Amo ma manciang-manciang Datuak Sati.

     “Kok ka mancari nilai juo ang, turuklah den kini juo. Coliak lah dek ang, apo nan nampak di rumpun aua kuniang tuh?” tanyo Datuak Sati ka Buyuang.

     “Banyak nan nampak, mak. Ado sarok aua, batang-batang aua. Nan takona dek den kato-kato peribasa-honyo, mak. Bagaikan aua jo tobiang. Yo lai sasuai bona nampak dek den. Aua ko tumbuah di tobiang. Dek ado aua ko, tobiang ko yo ndak ado runtuah nampak dek den. Yo saliang talong manolong bonanyo yo, mak. Simbiosis kecek dosen den di kampus ten,” kecek Bu-yuang Amo nan handak ma umpan-umpan Datuak Sati.

     “Apo nan nampak dek ang lai, Yuang?” tanyo Datuak Sati baliak.

     “Ndak ado lai, mak. Itu nyo. Mamangnyo ado filo-sofi lain atau pribahaso dari aua iko, mak?” tanyo si Buyuang ma manciang-manciang.

     “Donga dek ang dih. Pasang antene tuh elok-elok. Aua kuniang iko bahaso Indonesia nyo ‘bambu ku-ning’ dan bahaso latinnyo ‘bambusa vulgaris var. Striat’. Sabagaimano umumnyo aua nan masih satu va-rian jo botuang, tanaman iko mamiliki batang nan ba-rueh. Tumbuahnyo barumpun sahinggo kasado ba-tangnyo saliang tahubuang. Bak kato pepatah: bak cando manobeh aua sarumpun. Itulah arti dari kueknyo persatuan. Salain dari tanaman aua kuniang ko lah banyak dijadian tanaman hias dek urang kini. Di siko yo tanaman somak nampak dek ang. Cubolah poi ang ka kota godang ten a, aua kuniang iko ditanam ancak-ancak dalam pot. Di pajang dalam kantua-kantua go-dang atau bajadian bonsai rancak di taman-taman rumah mewah. Bisa banilai tinggi iko mah kalau ang puta kinca-kincia ang tuh,” kecek Datuak Sati sambia golak sengeng ka si Buyuang.

     “O baitu yo, mak. Memang apo bona kalobihan aua kuniang ko?” tanyo si Buyuang ma manciang-manciang.

     “E… yayai. Lah jak cako den joleh an ka waang, ndak juo kombang jalo ang tu,” turo-turo Datuak Sati.

     “Iyo, mak. Torangan bonalah ba a sabonanyo aua kuniang tuh. Bia nak sonang pulo kiro-kiro. Untuang-untuang bisa paham badan buruak ko,” kecek si Bu-yuang malunak an gigi dari lidah.

     “Kok baitu pintak ang den cubolah manorang-kannyo sakali lai. Untuak buliah ang tahu, aua kuniang ko banyak tumbuah di wilayah Asia Teng-gara. Caro mananamnyo bisa di-stek atau ang rondam dalam tobek. Beko kalau lah tumbuah tunehnyo bisa ang pindahan ka dalam pot.” Dan nampak si Buyuang Amo ongguak-ongguak balam mandonga panjolehan dari Datuak Sati. “Iko yang paliang pontiang, robuang-nyo bisa pulo ang gulai. Dan kini cubo ang ungka ro-buang aua ko agak tigo. Bia digulai pulo dek Etek Baya ang di rumah beko,” kecek Datuak Sati menyuruah si Buyuang ma ungka robuang.

     “E... yayai. Maungka robuang disuruahnyo awak ka siko, laporan apo yang ka awak tulis dari robuang ko,” turo-turo Buyuang suaro ketek supayo ndak tadonga dek Datuak Sati nan indak bijak-bijak bona.

     “Apo kecek, ang! Apo ndak tadonga dek den,” tibo-tibo sajo talingo Datuak Sati nyorian sajo pandonga-rannyo. “Untuak ang tahu, salain tanaman hias nan banilai ekonomi tinggi, aua kuniang iko banyak pulo dijadian kerajinan mah. Aden saisuak masih minum dari galeh nan dibuek dari aua ko dulu dek datuak den. Ado niru bagai dibuek dek datuak den, kandang ayam, dindiang tadia, sasak rumah jo paga. Urang-urang kini banyak pulo mambuek sovenir dari iko. Dan aua iko ndak ciek jo jenis nyo de. Ado botuang dan botuang itu banyak pulo jenisnyo. Sasudah itu ado poriang, tolang, sariak, buluah, dll. Kok iyo lai codiak ang, cubo ang sobuak an namo-namo daerah dari jenis tanam-tanaman iko,” kecek Datuak Sati ma uji-uji si Buyuang.

     “Kok itu nan mamak tanyoan, banyak sagetek lai tau den nyo. Donga dek mamak elok-elok yo: Nagori Aua Kuniang, Kelurahan Porak Botuang, Kelurahan Subarang Botuang, Nagori Tolang Anau, Nagori To-lang Maur, Nagori Sariak Laweh, Nagori Sungai Sa-riak, Jorong Buluah Kasok, dll. Ba a manurut mamak, apo lah cukuk tahu den kini?” kecek si Buyuang lah mulai bangga.

     “Iyo lah batambah santiang ang kini? Ba a dek lai manangkok antene ang kini?” kecek Datuak Sati panasaran.

     “Tontu lah iyo, mak. Cewek-cewek den dulu di daerah-daerah itu rumahnyo mah. Lai pernah den ka situ nyo,” kecek si Buyuang nan indak amuah diron-dahkan dek Datuak Sati.

     “E... yayai. Kuliah disuruah dek urang gaek ang kiro bacewek-cewek karojonyo. Yo lah ndak sandere. Ka jadi a lah ang bisuak,” sugah Datuak Sati nan tarangah mandonga jawek si Buyuang.

     “Jadi molah, mak. Tapi kok buliah tau, lai pandai mamak mambuek kerajinan-kerajinan nan dibuek dek datuak mamak dulu tuh?” tanyo si Buyuang ma man-ciang-manciang Datuak Sati.

     “Kalau itu nan ang tanyoan tantu lai bisa den. Ba a pulo aden urang lamo indak ka bisa dek ang tuh. Nan ka iyo jo lah kecek ang,” jaweb Datuak Sati lah mulai paneh.

     “Iyo molah, mak. Cubolah torang ka badan buruak ko, mak. Hinggo nak sonang pulo kiro-kiro,” pintak si Buyuang mambujuak-bujuak Datuak Sati.

     “Jadi molah. Untuak mambuek kandang ayam, tadia, atau karajinan bisa juo ang pakai botuang lento karano kulik sambilu nan lai lentur. Tapi kalau mama-kai aua kuniang ko bisa juo. Malahan bisa batambah rancak karno warno kuniangnyo nan mangkilek bisa dipoleh jo resin supayo makin pakek dan iduk war-nanyo. Kulik lua aua tuh ang kubak salampih-salam-pih sagodang duo jari. Bisa sapanjang 2 meter atau 3 meter. Beko ang anyam sarupo kerajinan di SD pakai karoteh marmer. Ang anyam ancak-ancak. Bagian lua ang munculkan samo-samo bagian lua dari aua nan ang kubak tuh. Sasudah itu jomua sampai koriang. Kalau lah koriang bisa ang agiah resin atau perlak dan pernis. Sangaik rancak untuak interior kafe dan itu bisa ang jua. Ang promo di Facebook ang tu atau di IG atau di TikTok. Ko indak, ma chat-chat anak gadih urang jo karajo ang. Pabanyak isi saku-saku tuh dulu, beko ka banyak jo yang ka mancucuak ka wang mah,” kecek Datuak Sati nan saraso dalam patandingan Indonesia mencukua Korea Selatan di Piala Asia U23. 

Feni Efendi, seorang penulis, peneliti, dan pengamat literasi yang berasal dari Payakumbuh