Buyuang Amo: Kumbuah Mansiang

 

Katiko hari lah mulai baranjak potang, sadang risau-risau nyo dagang di pasa, bajalan lah Datuak Sati Bona di Langik jo si Buyuang Amo ka Solok – Bingkuang di Payokumbuah. Hari nan indak paneh-paneh bona, tibo lah urang nan baduo ko di kawasan nan dipanuhi pa-yau (rawa). Di coliak suok jo kida hanyo payau-payau nan sarupo tobek. Kok dicubo masuak ka dalam akan diisok dek tanah-tanah tumbuah di dalam payau. Na-mun samantang baitu, di atehnyo tumbuah subur kumbuah-kumbuah.

     “Iko lai tau, ang? Iko nan namonyo kumbuah tuh,” kecek Datuak Sati mamatahkan sabatang tanaman mansiang yang dinamokan kumbuah.

     “Jadi dari siko asa usua namo Payakumbuah tuh, mak?” tanyo si Buyuang lah nan mulai panasaran.

     “Botuah, nakan. Ikolah tanaman kumbuah itu. Sa-bagian daerah namonyo iko adolah mansiang namun awak di siko manyobuknyo kumbuah. Kalau bahaso Indonesianyo disobuk ‘mensiang atau wilingi’ dan ba-haso latinnyo banamo ‘actinoscirpus grossus’,” kecek Datuak Sati manorangkannyo ka si Buyuang.

     “Ba a de bisa tau pulo mamak namo iko sampai ka baso latinnyo bagai?” kecek si Buyuang nan heran jo pangatahuan Datuak Sati.

     “E.. yayai. Aden kan baraja pulo dang mah. Lah tabayang dek den urang-urang bule itu ka manaliti tanaman-tanaman iko bisuak. Kalau den ndak tahu ba-haso latinnyo ka ba a pulo aden ka manorangkannyo. Jadi namo latin iko bisa balaku untuak saluruh dunia. Jan kan beda negara, beda nagori ajo lah bisa ba lain namo-namo tanaman iko mah. Kalau urang-urang tuh rami mencari den, tantu Etek Baya ang ten jadi batam-bah balanjo dapua nyo. Salain itu, dek den lah taba-yang pulo urang-urang pandia sarupo ang ka mancari namo-namo tanaman iko manamui den,” kecek Da-tuak Sati golak-golak sengeng madok ka si Buyuang.

     “Oh baitu, jadi malah, mak. Bararti Payaukumbuah itu payau-payau nan ditumbuhi kumbuah yo, mak? Kalau baitu, dima lokasi Payakumbuah itu, mak?” Kecek si Buyuang ka Datuak Sati.

     “E... yayai. Tompek togak wak kini ko nan namo-nyo Payaukumbuah tuh. Kawasan Solok Bingkuang, Balai Cacang, Nagori Koto Nan Godang ko,” sugah Datuak Sati nan mulai naiak gulonyo.

     “Ohh baitu. Bararti tompek basejarah iko yo, mak. Ba a dek ndak bajadian sebagai Kawasan Cagar Buda-ya dek pemerintah?” tanyo si Buyuang nan lah mulai ma manciang-manciang Datuak Sati.

     “Ba a pulo aden ka tanyoan. Tanyoan lah ka pe-merintah kio. Ka Dinas Pariwisata ten a. Manga loh ka aden ang tanyo an. Sibuk bona den ma urus itu, den ndak juo punyo wewenang de. Nan aden indak pulo digaji di situ de,” jawek Datuak Sati yang lah turun naiak bahunyo manahan bongih.

     “Soba...., soba, mak,” kecek si Buyuang golak-golak sengeng mancoliak Datuak Sati nan naik sugahnyo. “Jadih, apo guno tanaman kumbuah iko, mak? Dek baitu pontiang bona nampak sahinggo manjadi namo kota iko,” tanyo si Buyuang mandinginkan paneh hati Datuak Sati.

     “Kok itu nan ang tanyoan jadi molah. Sabalun den manjalehan guno tanaman kumbuah iko, paralu den sobuk an deskripsi tanaman iko. Kalau ndak den sobuk an, apo yang ka ang tulih di dalam laporan tu-gas kuliah ang tuh beko. Ang kan lai baok hape? Re-kamlah jo hape Ipong ancak ang tuh. Dari pado untuk palanggak an ajo guno e. Rancak untuk marekam iko lai. Kalau parolu rekam video. Ang uplod di YouTube. Kan lai takenal pulo mamak ang nan bijak ko. Urang gaek ang pun indak sio-sio pulo mambolian ang hape Ipong ancak tuh satelah manggadai sawah,” kecek Datuak Sati ka si Buyuang.

     “Kok baitu kecek mamak, jadih mak. Aden rekam lah kini juo,” kecek si Buyuang sambia mengaluan hape Ipong yang dibolian urang gaek sasudah mang-gadai sawah.

     “Tanaman kumbuah atau tanaman mansiang iko masih tagolong tanaman rumput-rumputan. Batang-nyo sagitigo, kuek, togak, dan banyak anaknyo. Tum-buah di boncah-boncah, payau-payau, dan daerah nan tanahnyo lombok. Ujuangnyo ado bungo ba bontuak bulek tolua mamanjang dan tinggi sakitar 50-80 cm. Bontuaknyo nan sagitigo malokuak ka dalam, sabolah ateh malokuak dingkek ba ujuang data nan runciang. Tanaman iko banyak tasebar di India, Cino, Asia Teng-gara, Cino Selatan, Kawasan Malesia, hinggo Australia di bagian tropis. Dan di Indonesia ado di sado daerah kacuali Nusa Tenggara dan Maluku. Adopun manfaat-nyo di zaman dulu batangnyo dipakai untuk mam-buek anyaman sarupo lapiak, karuang, kombuk, dom-pet., dll.,” kecek Datuak Sati manorangkannyo dengan gaya nan pacayo diri manghadap ka kamera hape Ipong nan direkam si Buyuang.

     “Lai tau mamak ba a caro mambueknyo,” tanyo si Buyuang mamanciang-manciang Datuak Sati.

     “Eh..., ba a pulo ka indak dek ang. Bara juo bisa den buek mah kalau ado urang nan mamboli. Kok dibuek banyak bona kini ndak ado urang nan ka mambolinyo de. Urang lobiah sonang balanjo ka kodai oren di hape tuh kini. Salain murah, mudah, dan modern pulo. Indak ketinggalan zaman sarupo iko,” kecek Datuak Sati ka si Buyuang nan nampak prihatin.

     “Kalau ndak ado urang nan mambuek lai, mako iko bisa punah, mak. Iko adolah kekayaan budayo bangso. Ka manjadi apo anak cucu awak bisuak nan indak ma-ngenal indentitas kebudayaannyo. Dan mamak lai urang nan masih ado, bakawajiban mamak malestari-kan iko sabagai kakayaan budayo bangso,” kecek si Buyuang nan toruh mamanciang-manciang Datuak Sati nan hampia tobik sugahnyo.

     “Aden omuah jo nyo, mang. Kok den kakok iko, jo a pulo Tek Baya ang ten barasok dapue e?” kecek Da-tuak Sati ka si Buyuang nan masih golak-golak sengeh.

     “Kok ma agiah balanjo tantu olun lai, mak. Tapi urang-urang sarupo mamak harus diapresiasi dek pe-merintah mah. Kok diangkek manjadi maestro lah atau penggiat kebudayaan atau dalam bontuak lain,” kecek si Buyuang ma angek-angek an Datuak Sati.

     “Tasorah ang lah. Ang ka baraja atau indak? Kalau iyo, donga kecek den,” kecek Datuak Sati nan kambali naiak turun bahunyo manahan bongi.

     “Jadih, mak. Torangkanlah lah baliak. Kok lai ka codiak badan mudo matah ko,” jawek si Buyuang nan lah mulai lunak gigi daripado lidahnyo.

     “Donga lah dek ang elok-elok. Sasudah batang-batang kumbuah iko dipangkeh di boncah-boncah atau di payau-payau mako batangnyo nan sagitigo itu dibuang jo pisau atau sambilu sehinggo suduknyo manjadi duo. Lalu dijomua di bawah matohari. Sama-kin paneh samakin copek koriangnyo. Katiko lah ko-riang mako diombunkan sagetek sahinggo warnanyo manjadi putiah. Sasudah itu lah bisa dianyam untuk mambuek lapiak, atau kombuk, dompet, dan lain-lain,” kecek Datuak Sati.

     “Salain untuk bahan karajinan, apo khasiat dari tanaman kumbuah iko, mak?” tanyo si Buyuang nan ingin mandapek an nilai A plus dari dosennyo.

     “E..., yayai. Itu makonyo ang disuruah sakolah ting-gi-tinggi. Supayo codiak sagetek. Paguno di dalam kampuang. Kok indak, malala ka kien, malala ka niak. Ba habih hari duduak di kodai. Nan bagunjiang an ndak joleh. Minantu si Udin yang tigo bulan nan pu-lang lah atau jando nan anak Rubiah nan lah kodok pulang malam. Kok ba itu juo hari-hari ang, indak ka kombang jalo ang de kalau toruh sarupo itu,” kecek Datuak Sati ka si Buyuang sarupo kuciang konai tukua.

     “Iyo lah mak. Den sangko mamak ko lai tahu. Mangkonyo den bantanyo. Kok indak tau yo indak lah. Manga pulo mamak manyingguang-nyingguang den duduak di kodai bagai,” jawek si Buyuang ta ibo hati dan tajawek pulo kecek mamaknyo.

     “Aden kan maingek an wa ang. Buruak senjuk ang di kampuang ko ka aden juo disobuk urang nyo. Ma-konyo timbang-timbang sagetek apo yang ka dikara-joan tuh. Indak ka salosai dek awak sorang jo de,” kecek Datuak Sati. “Kok nak tau ang apo kasiat dari tanaman kumbuah iko, malah awak coliak urang di Filipina ten. Di Filipina urek kumbuah iko bajadian ba-han pengerut, anti diare, anti muntah, tonikum hati, dan pancahar. Namun di siko olun ado den coliak urang mamakai nyo lai. Awak di siko kok sakik poi ka puskesmas atau ka pustu, atau dokter, klinik jo rumah sakik yang bukak 24 jam. Ang kan lai ado BPJS ndak?” kecek Datuak Sati mengingek an si Buyuang.

 Feni Efendi, seorang penulis, peneliti, dan pengamat literasi yang berasal dari Payakumbuh