Buyuang Amo: Tibarau

 

Indak jauah dari tompek si Buyuang mangarapai-garapai ma egang tanaman agam nampak lah somak tanaman tibarau dek Datuak Sati. Sambia ma ongguak-ongguak balam, manunjuak lah Datuak Sati ka somak tibarau itu. “Oi, Yuang! Cubolah ang coliak ka somak tuh a, apo namonyo tuh?” kecek Datuak Sati ma uji-uji Buyuang Amo.

“Jadih, mak. Kini juo den ka situ. Apo bona lah nan ado di situ.”

Setelah manguak somak-somak, ndak ado nan pontiang nampak dek Buyuang Amo. Tobik juo lah sugah si Buyuang, “Apo lah nan mamak suruah den ka siko. Ndak ado nan nampak de. Sarok somak-somak nyo. Somak-somak nan sarupo batang tobu. Kadang sarupo rumpuk gajah lai juo nampak dek den,” kecek Buyuang Amo.

     Sambia golak sarenge, “Yo itu nan den mukosuk. Tanaman nan sarupo tobu itu nan tibarau namonyo. Lai tau ang jo lagu Tiar Ramon nan bajudul Simpang Ampek: Kok ka parak tanamlah jambu / Sabatang tanam di halaman / Tuan umbuak denai jo tabu / Batang Tibarau baagiahkan,” kecek Datuak Sati manorangkan.

     “Memang apo bonalah sifat tibarau ko, mak, dek sampai bajadian lirik lagu bagai?” tanyo Buyuang Amo panasaran.

     “Buliah ang tahu yo, Yuang. Itu tibarau punyo sifat indak elok. Kok dicoliak sarupo tobu. Kok hiduk ba-rumpun-rumpun. Batangnyo barueh-rueh. Daunnyo panjang bakalupak. Dari jauah saroman bontuak tobu. Kok dikunyah indak baraia. Raso indak manontu. Kok ketek tumbuahnyo sarupo jaguang. Indak ba buah pu-nyo sifat pangicuah. Di ma nyo tumbuah di situ lah somak ka tibo. Kama angin baputa ka situ pulo inyo robah. Yo indak ba pandirian. Jan sampai sarupo itu pulo ang,” kecek Datuak Sati sambia ba papatah pa-titih sambia madok-madok ereng. Konai bona puncak hiduang si Buyuang.

     “Oh baitu yo, mak. Kok buruak-buruak bona lah sifat tibarau tuh, banyak sagetek tantu ado pulo gu-nonyo. Ndak ka sio-sio pulo tuhan manciptakannyo de,” kecek si Buyuang lah mulai bijaksano.

     “Kalau paguno nan ang tanyoan tontu ado pagu-nonyo. Donga bona lah dek ang elok-elok. Tibarau itu bahaso Indonesianyo ‘teberau’ dan bahaso latinnyo ‘saccharum spontaneum’ dan sabagian daerah lain gelabah, galoga, dan tobu arau. Sadangkan dalam ba-haso Ibrani namonyo “suph” nan bararti rumpuk tinggi nan hiduk di tompek baraie. Kan lah samo-samo awak coliak ko a, tibarau ko tumbuah di topian sungai. Satiok batangnyo tacoca ka tanah mako tumbuah lah urek di situ. Dan urek-urek iko lah nan manahan tanah atau pasie di topian sungai. Katiko ado banjir mako ta-pian sungai manjadi kuek. Satiok ureknyo nan manjala ka topian sungai mako akan manjadi daratan baru. Jadi rancak bona tibarau ko tumbuah di topian sungai untuak manghindari erosi,” kecek Datuak Sati manja-lehan ka si Buyuang Amo.

     “Oh baitu yo, mak. Lai bisa tanaman tibarau iko untuk kerajinan? Karano tugas den dari dosen mancari manfaat gunonyo sabagai bahan kerajinan? Kalau ndak baitu, untuk apolah gunonyo mamak torangkan ka den. Indak dapek nilai den beko” kecek si Buyuang turo-turo.

     “Kok itu nan ang mintak, ba indak aka codiak ang tuh ang pagunoan? Sasomak iko tanaman tibarau, ang putalah kincia-kincia ang tuh supayo bisa manjadi barang nilai guno. Kan ba kurang juo pangangguran di kampuang iko,” kecek Datuak Sati menembak si Buyuang.

     “Indak itu nan mukosuk den deh, mak. Lai ado nampak dek mamak urang manggunokan tanaman tibarau ko?” tanyo si Buyuang manahan soba.

     “Jadih molah. Donga dek ang elok-elok yo. Daun tibarau ko maso saisuak digunoan untuak atok rumah. Daun tibarau ko kalau dianyam dan dijomua, samo rancaknyo jo daun rumbio. Tahan dari paneh jo ujan. Ado pun di Afrika ten, tanaman tibarau iko digunokan untuak ma usie serangga. Tanaman kategori paragis iko salosai diteliti dek para ahli ta nyato mamiliki sumber protein. Daunnyo punyo sanyawa silikon mo-noksida, kalsium oksida, dan klorin. Tanaman iko dija-dian ubek herbal dengan caro ma obuh daunnyo un-tuk ma ubek panyakik kanker, kista ovarium, dan mio-ma, panyakik ginjal, artritis, diabetes, dan ma ontian pandarahan luko. Itu lah sabagian kasiat dari tanaman iko. Itu sakolah rajin-rajin den suruah ang. Jan pandia juo sarupo iko,” kecek Datuak Sati madok ereng ka si Buyuang.

     “Oh, baitu yo mak. Tapi apo pulo kaitannyo jo namo daerah?” tanyo si Buyuang manciang-manciang.

     “Yo ndak manyimak ang de yo. Lah sapanjang tali boruak den jolehan ka waang sojak cako indak juo ma-nangkok antene ang de. Lah jaleh namo tibarau iko disobuk urang tobu arau di siko, mako bisa jadi dari situ asa namo Nagari Arau ten a. Tompek wisatawa nan ancak tuh. Nan lah manjadi Geopark. Di situlah ba hulu sungai Batang Arau nan banyak ditumbuhi tobu arau atau tibarau. Samo jo sungai Batang Agam nan banyak ditumbuhi tanaman agam sehinggo sungai tu banama Batang Agam na ba hulu sungai dari Luhak Agam. Lai jaleh dek ang? Apo parolu pulo den sompa an ka talingo ang nan mada tuh. Kok lai ka baputa kincia-kincia ang sasudah itu,” sugah Datuak Sati nan indak bijak-bijak bona. 

 Feni Efendi, seorang penulis, peneliti, dan pengamat literasi yang berasal dari Payakumbuh